ރައްޔިތުންގެ މަޖިލީހުގެ ޤަވާއިދުގެ 157 ވަނަ މާއްދާގެ (ރ) ގެ 3 ވަނަ ނަންބަރުގެ ދަށުން މަޖިލީހުގެ މެންބަރުންގެ އިމްތިޔާޒުގެ މައްސަލައެއް 15 ޖޫން 2010 ވަނަ ދުވަހު ވިލުފުށީ ދާއިރާގެ މެންބަރު ރިޔާޒް ރަޝީދު މަޖިލީހަށް ހުށަހަޅައިފި

ޖޫން14 2010 ވަނަ ދުވަހުއޮތް ރައްޔިތުންގެ މަޖިލީހުގެ 2010 ވަނަ އަހަރުގެ 2 ވަނަ ދަޢުރުގެ 4 ވަނަ ޖަލްސާގައި ރައްޔިތުންގެ މަޖިލީހުގެ ރައީސް އަލްފާޟިލް ޢަބްދުﷲ ޝާހިދު މަޖިލީހުގެ ރިޔާޞަތުގައި އިންނަވައިގެން ދަޢުލަތުގެ މުއައްސަސާތަކުގެ ފަރާތުން ރައްޔިތުންގެ މަޖިލީހުގެ މެޖޯރިޓީ ލީޑަރާއި، މައިނޯރިޓީ ލީޑަރަކީ ސަރުކާރުގެ ދަރަޖަތަކުގެ ތެރެއިން ވަޒީރުންގެ ދަރަޖަ ކަމުގައި ބެއްލެވުމަށް ރައްޔިތުންގެ މަޖިލީހުން ފާސްކުރުމެއްނެތި އެދިވަޑައިގެންނެވިހިނދު،

ރައްޔިތުންގެ މަޖިލީހުގެ މެންބަރުންގެ މެދުގައި ހަމަހަމަކަން ގެއްލޭގޮތަށް މަޖިލީހުގެ ރިޔާޞަތުން ޢަމަލުކުރުމުގެ ސަބަބުން މުޅިމަޖިލީހުގެ ހައްގަށާއި، މެންބަރުންގެ އިމްތިޔާޒަށާއި މުޅިމަޖިލީހުގެ އިމްތިޔާޒަށް އުނިކަން ލިބޭގޮތަށް މަޖިލީހުގެ ރައީސް ޢަމަލުކޮށްފައި ވީހިނދު،
މަޖިލީހުގެ މެންބަރުންގެ މެދުގައި ހަމަހަމަކަން ގެއްލޭގޮތަށް ޤާނޫނުއަސާސީގެ 20 ވަނަ މާއްދާއާއި ޚިލާފަށް ރައްޔިތުންގެ މަޖިލީހުގެ މެންބަރުން ގެ މެދުގައި ޤާނޫނުގެ ރައްކާތެރިކަމާއި، ޤާނޫނުން ލިބިދޭ މަންފާތައް ހަމަހަމ ކަމާއެކު ނުލިބޭނެ ގޮތަކަށް، މަޖިލީހުގެ ޤަވާއިދުގެ 153 ވަނަ މާއްދާގެ (ށ) އާއި ޚިލާފަށް މަޖިލީހުގެ މެންބަރުންގެ ޙައްޤުތަކާއި އަބުރަށް އުނިކަން ލިބޭގޮތަށް މެންބަރުންގެ މެދުގައި ތަފާތުކޮން ޢަމަލުކޮށްފައިވީހިނދު،

މަޖިލީހުގެ ޤަވާއިދުގެ 30 ވަނަ މާއްދާގެ (ނ) ގައި ބަޔާންކުރާ ގޮތުގެމަތީން މަޖިލީހުގެ މެޖޯރިޓީ ލީޑަރާއި، މައިނޯރިޓީ ލީޑަރަށް މަޖިލީހުން ހަމަޖައްސާނެ އުޞޫލުތަކެއް ކަނޑައެޅުމުގައި ޕާޓީ ތަކުގެ އިސްވެރިންނާއެކު މަޝްވަރާކުރުމުގައި ހަމައެކަނި މެޖޯރިޓީ ލީޑަރާއި މައިނޯރިޓީ ލީޑަރާއެކު އެކަނި މަޝްވަރާކޮށް ގޮތެއް ކަނޑައެޅުމުގައި މަޖިލީހުގައި ހިމެނޭ އެހެން ޕާޓީތަކުގެ ޕާލިމެންޓަރީ ލީޑަރުން ބައިވެރިނުކޮށް ގެންދަވާ މަޝްވަރާތަކަކީ ޞައްޙަ ގޮތުގައި ކުރެވޭ މަޝްވަރާތަކަަކަށް ނުވާނެތީއާއި މަޖިލީހުގައި ޕާޓީތައް ތަމްޞީލުކުރުމުގައި އިންޞާފުން އެއްކިބާވެ ހުރެ މަޖިލީހުގެ ރިޔާޞަތުން ޢަމަލުކުރަމުންދާ ދިއުމާމެދު ކަންބޮޑުވީހިނދު،

ރައްޔިތުންގެ މަޖިލީހުގެ ޤަވާއިދުގެ 157 ވަނަ މާއްދާގެ (ރ) ގެ 3 ވަނަ ނަންބަރު ގައިވާ ގޮތުގެމަތީން މަޖިލީހާއި މަޖިލީހުގެ މެންބަރުންގެ އިމްތިޔާޒުގެ މައްސަލައިގެ ނޯޓިސް ފޮނުވައި މިމައްސަލަ މަޖިލީހުގެ ޤަވާއިދުގެ 153 ވަނަ މާއްދާގެ (ހ) ދަށުން އެންމެ މުހިންމު އިސްކަމެއް ދޭ މައްސަލައެއްގެ ގޮތުގައި ރައްޔިތުންގެ މަޖިލީހަށް ހުށަހަޅަމެވެ. އަދި އިމްތިޔާޒުގެ މި މައްސަލައާއި ގުޅޭ 14 ޖޫން 2010 ވަނަ ދުވަހު އޮތް ރައްޔިތުނަގެ މަޖިލީހުގެ 2010 ވަނަ އަހަރުގެ 2 ވަނަ ދަޢުރުގެ 4 ވަނަ ޖަލްސާގެ ޔަޢުމިއްޔާގެ އެބައި ހިމެނޭ ކޮޕީއެއް ފޮނުވީމެވެ.
15 ޖޫން 2010

އިމްތިޔާޒު ގެ މައްސަލަ ހުށަހަޅާ ފަރާތް: ވިލިފުށީ ދާއިރާގެ މެންބަރު ރިޔާޒް ރަޝީދު

ސޮއި