އެމްޑީޕީ ގެ ޗެއަރޕާޝަން ގެ މަޤާމު އަލުން ހޮވުމާއި، އިބްރާ އެމްޑީޕީ އަށް އެނބުރިއައުން އިއްތިފާޤެއްބާ؟

އެސް އެލް ޕީ ގެ ފައުންޑަރ އިބްރާހިމް އިސްމާޢީލް އެނބުރި އަލުން އެމްޑީޕީ އާއި ގުޅިވަޑައިގަތުމަކީ އެމްޑީޕީ އަށް ލިބުނު ކާމިޔާބެއް ކަމަށް އެއްބަޔަކު ބުނާއިރު އަނެއް ބަޔަކު ބުނަނީ މިދުވަސްވަރާ ދިމާކޮށް އިބްރާ ޕާޓީއާއި ގުޅިވަޑައި ގަތުމުގެ ފަހަތުގައި ގިނަކަންތައްތަކެއް އޮތްކަމަށެވެ. ބައެއް ބޭފުޅުން ވިދާޅުވާ ގޮތުން ނަމަ، އިބްރާ ކުރިން ވަކިވެ ވަޑައިގަތީ ޕާޓީގެ ރައީސަކަށް ހުންނަވާ ރައީސްގެ ބަހަށް ވުރެ ޕާޓީގެ އޭރުގެ ޗެއަރޕާޝަން މިހާރުގެ ރައީސުލްޖުމްހޫރިއްޔާ މުހައްމަދު ނަޝީދު ގެ ބާރު މާބޮޑަށް ޕާޓީގެ އެތެރޭގައި ގަދަވުމުގެ ސަބަބުން ކަމަށެވެ އެކަން އެގޮތަށް ހިނގަމުން ދިޔަކަން އޭރުގެ ސިޔާސީ ހަޤީގަތަކަށް ވެދާނެއެވެ.

ދާދި މިދާކަށް ދުވަހު މިވަނީ އެތެރޭގެ އިންތިހާބުގައި ޕާޓީގެ ރައީސް އާއި ނާއިބު ރައީސް ގެ މަޤާމަށް ދެބޭފުޅަކު އިންތިހާބު ކުރައްވާފައެވެ. މެންބަރުންގެ ފުރިހަމަ އިތުބާރު ލިބިފައިމިވަނީ ދެމަޤާމަށްވެސް އައްޑޫ ސިޓީއަށް ނިސްބަތްވާ ދެބޭފުޅުންނަށެވެ. ދެން އޮތް އެންމެ މުހިންމު މަޤާމު ކަމަށްވާ ޗެއަރޕާސަން ގެ މަޤާމަށް ބޭފުޅަކު ހޮވުމުގެ ފުރުޞަތު ބޯމަތިވަމުން އަންނައިރު އެކަމަށް އިބުރާ ވެސް ފަރިވަމުން އަންނަ ކަމުގައި ބައެއްފަރާތްތަކުން ޤަބޫލުކުރެއެވެ.

އެމްޑީޕީ ގިނަ މެންބަރުން ޤަބޫކުކުރާ އެއްކަމެއް މިހާރުވަނީ ވަރަށް ރަނގަޅަށް ހާމަވެފައެވެ. ބަދަލެއް ބޭނުންވާ ކަމަށާއި ބަދަލަކީ ކުރިން ކަންކުރި މީހުންނޫން އެހެން ބަޔަކު ލީޑަރޝިޕަށް ފުރުޞަތު ދިނުމުން ނޫނީ ޕާޓީ އިތުރަށް ހަރުދަނާނުވާނެކަމަށެވެ.
އިބްރާ އަކީ ހަރުދަނާ ޤާބިލު ބޭފުޅެއް ކަން ޔަޤީނެވެ އެހެން ނަމަވެސް މެންބަރުން ގެ ހިތުގައި ޖައްސާ ޕާޓީ ދޫކޮށްލާފައި މުހިންމު ދަނޑިވަޅުގައި އިބްރާ ވަޑައިގަތުން އަދިވެސް މެންބަރުންގެ ހިތްތަކުން ފިލައިގެން ނުދާކަމަށް ބައެއް މެންބަރުން ހާމަކުރެއެވެ.

ތިމަރަފުށީ ދާއިރާގެ މެންބަރު މުހައްމަދު މުސްތަފާގެ ބަހުންނަމަ އެމްޑީޕީ ގެ ޗެއަރޕާޝަން ކަމުގެ މަޤާމަށް ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު ކުރިމަތިލާނެކަމަށް އިއުލާންކުރުމުން އޭނާއކީ އެފަދަ މަޤާމަކަށް ކުފޫ ހަމަވާ ބޭފުޅެއް ނޫންކަމަށް ބުނެ ފާޅުގައި ދެކޮޅުހައްދަވާފައެވެ.

ކޮންމެ ގޮތަކަށް ކަންތައް ދިއަނަމަވެސް ޗެއަރޕަރޝަން ގެ މަޤާމަށް އިބުރާ ވާދަކުރައްވާނެކަމަށް ގިނަބަޔަކު ޤަބޫލުކުރާ ފަދައިން ބަދަލެއްކަމަށް ދެކިގެން ޗެއަރޕާޝަން ގެ މަޤާމަށް އިބުރާއަކީ ބަދަލެއްކަމަށް ނުދެކޭ ގިނަ މެންބަރުންތަކެއް ތިބޭނެކަންވެސް ޤަބޫލުކުރަން ޖެހެއެވެ. ޚިޔާލަކީ ތަފާތުއެއްޗެކެވެ މިޚިޔާލާ މުޅިން ތަފާތުކޮށް ކަންހިނގުމަކީ ވެސް ހަމަ ނުވެ ނުދާނެކަމެއް ދޮގެއްތޯއެވެ.