އިސްލާމްދީނަށް ފުރައްސާރަކުރަން އެއްވެސް މީހަކަށް ފުރުޞަތު ދެވިގެންނުވާނެ.

ރައްޔިތުންގެ މަޖިލީހުގެ ރިޔާސަތުން ޤާނޫނުއަސާސީ އާއި މަޖިލީހުގެ ޤަވާއިދާއި ޚިލާފަށް މަޖިލީހުގެ ކަންކަން ކުރަމުންގޮސް އެންމެ ފަހުން ރައްޔިތުންގެ މަޖިލީހުގައި ، ދިވެހި ދަޢުލަތުގެ ދީންކަމުަގއިވާ މާތްވެގެންވާ އިސްލާމްދީނަށް ވެސް ޤާނޫނުއަސާސީއާއި ޚިލާފަށް ފުރައްސާރަ ކުރުމުގެ ފުރުޞަތު މަޖިލީހުގެ ރިޔާސަތުންދީ އެފަދަ ބައްދަލުވުމަކަށް މަޖިލީހުގެ މެންބަރުންނަށް ދަޢުވަތުދީގެން ގެނެސްގެން ކުރައްވަމުން މިގެންދަނީ ކޮންފަދަ ނުރައްކާތެރި ޖަރީމާއެއްތޯއެވެ

ދިވެހިރާއްޖޭގެ އެންމެހާ ރައްޔިތުންނާއި ދިވެހިރާއްޖޭގައި އުޅޭ އެންމެހާ ފަރާތްތަކުގެ މައްޗަށް ވެސް ޤާނޫނުއަސާސީ ލާޒިމުކުރަނީ ޤާނޫނުއަސާސީއަށް ހުރުމަތްތެރިކޮން ހިތުމަށެވެ އަދި ޤާނޫނުއަސާސީގައި ދިވެހި ދަޢުލަތުގެ ދީނަކީ އިސްލާމްދީނުކަމަށާއި، އިސްލާމް ދީނުގެ އަސްލަކާ ޚިލާފަށް އެއްވެސް ޤާނޫނެއް ނުހެދޭނެކަމަށާއި، އަދި އިސްލާމްދީނަކީ ޤާނޫނުއަސާސީ މައިގަނޑު މަސްދަރު ކަމުގައި ބަޔާންކޮށް ފައިވަނިކޮށް، ޤާނޫނުއަސާސީ އުފަންކުރި ބިނާގައި ތިބެގެން އިސްލާމްދީނަށް ފުރައްސާރަކޮށް ރައްޔިތުންގެ މަޖިލީހުގެ މެންބަރުންނާ މުހާތަބުކޮށް، އިސްލާމްދީނަށް އެއްވެސް އިހްތިރާމްކުރުމެއްނެތި ، ދީނީ ބައިބައިވުންތައް އުފެއްދުމަށް ހިއްވަރަކަށްވާ ފަދަ ވާހަކަތައް ދެއްކުމަށް ފުރުސަތު ދިންކަމީ އިދިކޮޅު ޕާޓީތަކަށް ނިސްބަތްވާ މެންބަރުން މަޖިލީހުގެ ރިޔާސަތުގައި ތިއްބަވައިގެން ކުރެއްވި ވަރަށް ނުރައްކާތެރި ޖަރީމައެއްކަމަށްވާތީވެ، ރައްޔިތުންގެ މަޖިލީހުގެ މެންބަރުގެ ހައިސިއްޔަތުން ދިއްދޫ ދާއިރާގެ ރައްޔިތުންގެ ނަމުގައި މިޢަމަލު ވަރަށްބޮޑަށް ކުއްވެރިކުރަމެވެ

ދުނިޔޭގެ ހިއުމަން ރައިޓްސް ކޮމިޝަންގެ މެންބަރުކަށް ރާއްޖޭގެ ހިއުމަންރައިޓްސް ކޮމިޝަނަށް ލިބުމަކީ އިސްލާމްދީނާ ދެކޮޅުވެރި ވާހަކަތައް ދުނިޔޭގެ ހިއުމަން ރައިޓްސް ކޮމިޝަނުގެ ވެރިން ރާއްޖެއައިސް ދެއްކުމަށް ހުޅުވިގެން ދިޔަ ދޮރެއް ކަމުގައި ދެކި އެފަދަ ޢަމަލުތައް ދިވެހިރާއްޖޭ އެއްވެސް ތަނެއްގައި ހިންގުމަށް އެއްވެސް ފުރުޞަތެއް ދެވިގެނެއް ނުވާނެއެވެ
ރައްޔިތުންގެ މަޖިލީހުގައި މަޖިލީހުގެ މެންބަރުންނާ މުހާތަބުކޮށް އެއްވެސް ގޮތަކުން ތަޤްރީރުކުރުމަށް އެއްވެސް ފަރާތަކަށް ފުރުޞަތެއް މަޖިލީހުގެ ރިޔާސަތުން ބޭނުންވީމާ ދެވޭނެކަމަކަށް ޤަބޫލެއް ނުކުރެވެއެވެ
އިންސާނީ ހައްގުތައް ހިމާޔަތްކުރާ ދުނިޔޭގެ ޖަމާޢަތުގެ ވެރިއަކަށް ހުރެ ޕިއްލޭ އަށް މުސްލިމުންގެ ހައްގުތަކަށް އިހްތިރާމު ނުކުރެވޭނަމަ، އޭނާއަކީ އެފަދަ މަޤާމަކަށް ކުފޫހަމަވާ މީހެއްކަމުގައި މުސްލިމް ދިވެހިރައްޔިތުން ނުދެކޭނެކަމުގައި ޤަބޫލުކުރަންޖެހޭނެއެވެ

އަދި ދާދި ފަހުން މަޖިލީހުގެ މެންބަރަކު ހިމެނޭ ގޮތަށް ހިއުމަން ރައިޓްސް ކޮމިޝަންގެ ފަރާތުން ވެސް ބައިވެރިވި އެއިޑްސް އާއި ދެކޮޅަށް ނޭޕާލް ގައި އޮތް ކޮންފަރެންސަކީ ވެސް ނަމެއްގައި އެއިޑްސް އާއި ދެކޮޅަށް ކަމަށް ބުނެ މި ކޮންފަރެންސް ގައި އޮތީ އެއްޖިންސުން ގުޅުން ހިންގާ މީހުންނާއި ޖިންސީ ވިޔަފާރި ހިންގާ މީހުންގެ ހައްގުތައް ހޯދުމަށް ކަމަށްވާއިރު އެންމެ ނުރައްކާތެރި ކަމަކީ އެއްޖިންސުން ޖިންސީ ގުޅުން ހިންގާ މީހުންގެ ފަރާތުން މަދަނީ ޖަމުޢިއްޔާ އަކުން ދިވެހިރާއްޖެ ތަމްސީލުކުރާ ފަރާތެއްކަމަށް ބުނެ ދިވެއްސަކަށް ވަނީ ޔޫ އެން އިން ފުރުޞަތުދީފައެވެ އަދި އެކޮންފަރެންސްގައި ބައިވެރިވި ދިވެހި ޑެލިގޭޝަން ގައި ނުހިމެނޭ މީހަކު އޮޅުވާލުމުގެ ތެރެއިން އެންމެ ފަހުވަގުތު ދިވެހި ޑެލިގޭޝަނާއެއްތަނެއްގައި އިށީިނުމުގެ ފުރުޞަތުވެސް ވަނީ އެކަން އިންތިޒާމުކުރި ފަރާތުން ހަމަޖައްސާފައެވެ. މިކަމާ ރާއްޖޭގެ ހިއުމަން ރައިޓްސް ކޮމިޝަނުން އެއްވެސް ބަހެއް ނުބުނެ ހަނުހުންނަވާކަމާމެދު ނުހަނު ކަންބޮޑުވަމެވެ