ހއ. ދިއްދޫ ރައްޔިތުން ބަދުނާމުވާގޮތަށް ބައެއް މީޑިއާ ތަކުން ގެނެސްދީފައިވާ ޚަބަރު ކުއްވެރިކުރުން

ހއ. ދިއްދޫ އެމްޑީޕީ ޖަގަހަ އެއްގެ ތެރޭގައި މަސްތުވާތަކެތި ބޭނުންކުރަން ތިބި ބަޔަކު ދިއްދޫ ފުލުހުން ހައްޔަރު ކުރިވާހަކަ ރާއްޖޭގެ ބައެއް ނޫސްތަކާއި ރޭޑިއޯ އާއި ޓީވީ ޗެނަލްތަކުން ގެނެސްދީފައިވަނީ ކަމުގެ އެއްވެސް ހަޤީގަތެއް ނުބަލާ ދިއްދޫ އަކީ މަސްތުވާ ތަކެތީގެ ނުބާ ވަބާއިން ދުރުވަން މަސައްކަތް ކުރާ މުޖުތަމަޢުއެއް ކަމަށް ވެފައި މިއަދާ ހަމައަށް ވެސް ދިއްދޫ ރައްޔިތުންގެ ބުރަމަސައްކަތުން އެފަދަ ނޭދަެވޭ ޢަމަލުތައް ދިއްދޫގައި އަށަގަތަ ނުދީ ދިއްދޫ އަކީ މަސްތުވާތަކެތީގެ ވަބާއިން ސަލާމަތްވެފައިވާ މަދު ރައްތަކުގެ ތެރެއިންވެސް ނަމޫނާ ރަށަކަށް ވެފައި، އަދި ނުރައްކާތެރި މާރާމާރީ އާއި ތަޅާފޮޅުމާއި ފޭރުމުގެ ޢަމަލުތަކުން ސަލާމަތް ވެފައިވާ މުޖުތަމަޢު އެއްކަމުން މި ފަދަ ނަމޫނާ ރަށަކާ މެދު ޚަބަރު ފަތުރާ ވަސީލަތްތަކުން އެފަދަ ނޭދެވޭ ޚަބަރެއް ފަތުރާނަމަ، އެކަން ހިނގާދިޔަ ގޮތުގެ ފުރިހަމަ މަޢުލޫމާތު ނުހޯއްދަވާ އެފަދަ ނޭދެވޭ ކަންކަމުގެ ބަދުނާމު ދިއްދޫ ލޮބުވެތި ރައްޔިތުންގެ ބޮލުގައި އެޅުވުމަކީ އެއްގޮތަކަށް ވެސް ޒިންމާދާރު ނޫސްވެރިކަމެއްގައި ހިނގާގެން ވާނެކަމެއް ކަމަކަށް ޤަބޫލެއް ނުކުރެވެއެވެ

ދިއްދޫ އާއި ބެހޭގޮތުން ސަން އެފް އެމް އޮންލައިން ގައި އެ ޚަބަރު އެގޮތަށް ގެނެސް ދީފައިވާތީވެ، ނިހާޔަތަށް މާޢާފަށް ވެސް އެދި ވަނީ ލިއުއްވާފައެވެ.
އަދި އެކަމުަގެ ހަޤީގަތް ނުބައްލަވާ މި ދެންނެވި ވިއާނުދާ ނޭދެވޭ ޚަބަރު އެމަގުން އެގޮތަށް ދިއްދޫ އަށް ނިސްބަތްވާ ބައެއް ފަރާތްތަކުން އެ ޚަބަރު ގެނެސްދީ ފައިވާތީ އެކަމާމެދު ނުހަނު ބޮޑަށް ހިަތާމަކުރަމެވެ.

ދިއްދޫ އަކީ މިއަދު އަޅުގަނޑުމެން ފަޚުރުވެރި ވާފަދަ ރަށެކެވެ ވަރަށް ސިޔާސީ ރަށެކެވެ އެހެނަސް އިޖްތިމާޢީ ރައްކާތެރިކަމާއި މަސްތުވާތަކެތީގެ ނުރައްކަލުންނާއި މާރާމާރީ އާއި ގަތުލުއާންމާއި، ވައްކަމާއި ފޭރުމުގެ ނުބައި އާދައިން ސަލާމަތްވެފައިވާ މުޖުތަމަޢުއެއް ދިރިއުޅެމުންދާ ފަޚުރުވެރި ރަށެކެވެ

އެހެން ކަމުން ކަމުަގެ ހަޤީގަތާއި ޚިލާފަށް ރާއްޖޭގެ ޚަބަރު ފަތުރާ ބައެއް ވަސީލަތްތަކުން އެކަން އެންމެ ޒިންމާދާރުކަންމަތީ ގެނެސް ދީފައި ނުވާތީވެ، ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރުގެ ހައިސިއްޔަތުން އެކަން އެންމެ ހަރުކަށި އިބާރާތުން ކުއްވެރިކޮށް ކުރިމަގުގައި މިފަދަ ޒިންމާދާރުކަން ކުޑަގޮތަކަށް ޚަބަރުތައް ނުގެނައުމަށް ސަމާލުކަން ދެއްވުމަށް ދަންނަވަމެވެ.

އަހްމަދު ސަމީރު / ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރު